ميزان ساويرس والمبادرة

اولا فى حاجة مهمة عايزة اكلم عنها وهو موضوع المهندس نجيب ساويرس انا كنت قاعد على التويتر لما بعت الصورة واتهاجم جدا وهو يستاهل لانة حط نفسة فى موقف زى دة وانا مش بدافع عن حد لانة غلطان ولكن انا ضد سياسة الكيل بمكيالين لان يوم الخميس اللى فات محمود معروف حرف القران فى العمود بتاعة فى الجمهورية ومحدش فكر يقاطع او يهاجم مع انى انا شابيف ان جريمة معروف اكبر بكتير من ساويرس ولا هو عشان نجيب مسيحى مع ان عالمنا الجليل الشيخ ابو اسحاق الحوينى قال هنعاقب كل من يسىء للاسلام سواء كان مسلم او نصرانى فارجو ان ننتبهة حتى لا نقع فى خطا التفريق بين الناس تبعا للاهواء.
ثانيا انا كنت النهاردة فى الاجتماع التاسيسى لمباردة تعالوا نكتب الدستور واللى بينظمها مجموعة من النشطاء زى علاء عبد الفتاح وخالد عبد الحميد واخرين والاجتماع ابتدا بعرض لفكرة المبادرة ومراحلها وطريقة العمل والية عمل المجاميع والاجابة على اسئلة الناس اللى كانت حاضرة وتم التقسيم لثلاث مجموعات مجموعة البحث ومجموعة التكنولوجيا ومجموعة العمل التطوعى والميدانى وانا انضميت للمجموعة الثالثة اللى بيشرف عليها علاء واسماء وراجية ودة مهمتها عمل شبكة من المتطوعين على مستوى الجمهورية وتكوين قنوات اتصال وعلى العموم انا متفائل بالمبادرة وربنا يسهل والاجتماع الجاى يوم السبت 2/7 بمركز هشام مبارك الساعة 6.30